ក្នុងនាមមន្ទីរសម្រាកព្យាបាលកុមារឱរ៉ាល់ ខ្ញុំបាទសូមថ្លែងអំណរគុណដល់អតិថិជន និងមាតាបិតាគ្រប់រូបដែលបាននាំយកបុត្រធីតាមកទទួលយកសេវាពិនិត្យ ពិគ្រោះព្យាបាល និងថែទាំ នៅមន្ទីរព្យាបាលយើង។

ខ្ញុំបាទបានចាប់ផ្ដើមអាជីពជាវេជ្ជបណ្ឌិតកុមារអស់រយៈពេលជាង10ឆ្នាំមកហើយ។ ក្នុងអំឡុងពេលនេះ ខ្ញុំបាទមានមោទនភាពក្នុងការចូលរួមផ្ដល់នូវការព្យាបាលដល់កុមារតូចៗជាច្រើនមឺននាក់ទាំងនៅស្ថាប័នសាធារណៈ និងឯកជន។ ទារកនិងកុមារ ជាក្រុមដែលងាយរងគ្រោះ និងត្រូវការការយកចិត្តទុកដាក់ និងមើលថែទាំដើម្បីឲ្យពួកគាត់អាចធំធាត់ប្រកបដោយបញ្ញា ស្មារតី និងសុខភាពល្អ។ មន្ទីរសម្រាកព្យាបាលកុមារឱរ៉ាល់បានត្រៀមខ្លួនរួចរាល់ក្នុងការចូលរួមជាមួយនឹងមាតាបិតាលើបេសកកម្មថែទាំកុមារតូចៗដែលជាទំពាំងស្នងឬស្សីរបស់យើង។ វេជ្ជបណ្ឌិត ក្រុមគិលានុបដ្ឋាក និងក្រុមការងារ របស់យើង គឺជាអ្នកអាជីពដែលសុទ្ធតែបានឆ្លងកាត់ការបណ្ដុះបណ្ដាល ព្រមទាំងមានគុណវឌ្ឍ លក្ខណៈសម្បតិ្ត និងបទពិសោធន៍គ្រប់គ្រាន់ក្នុងការព្យាបាលថែទាំកុមារ។ មន្ទីរសម្រាកព្យាបាលកុមារឱរ៉ាល់គោរពតាមបទដ្ឋាន និងស្តង់ដាវេជ្ជសាស្រ្តក្នុងការពិនិត្យ ពិគ្រោះ និងព្យាបាល។ យើងមិនណែនាំ ឬអនុវត្តការព្យាបាលដែលមិនចាំបាច់ដើម្បីប្រាក់ចំណូល ឬដើម្បីឱ្យឆាប់ឃើញថាធូរស្បើយលឿន ប៉ុន្តែប៉ះពាល់អវិជ្ជមានដល់សុខភាពក្នុងរយៈពេលយូរអង្វែង។ ការព្យាបាលទាំងអស់គឺផែ្អកលើភស្តុតាង និងចំណេះដឹងវេជ្ជសាស្ត្រដើម្បីសុខភាព និងសុខុមាលភាពពិតៗរបស់កុមារយើង។

យើងមានគោលដៅ និងចក្ខុវិស័យយូរអង្វែងក្នុងការកសាងកេរ្តិ៍ឈ្មោះ និងលើកកម្ពស់ទំនុកចិត្តទៅលើវិស័យវេជ្ជសាស្រ្តនៅក្នុងប្រទេសកម្ពុជា។ ខ្ញុំបាទសូមអញ្ជើញមាតាបិតាគ្រប់រូបចូលរួមជាមួយមន្ទីរសម្រាកព្យាបាលកុមារឱរ៉ាល់នៅក្នុងបេសកម្មនេះ ដើម្បីជាប្រយោជន៍ដល់បុត្រធីតា ក៏ដូចជាវិស័យវេជ្ជសាស្ត្រកុមារនៅក្នុងប្រទេសយើង។ សូមអរគុណ!